"WEREMNA"...يوميات مواطنة مفقوعة.....الحلقة العاشرة

تعالوا بقى ننسى القرف شوية و نحاول نضحك..و لو ان اللى شايفينه الايام دى ميضحكش

مهزلة المرشحين الرئاسيين اللى انا بشوفها بقالى يومين دى على قد ما ضحكتنى على قد ما خلتنى احزن عالوضع المزرى اللى وصله الشعب المصرى بعد عقود طويلة من القهر و الظلم و الفقر

ناس عادية جدا و اقل من العادية كمان...قررت ترشح نفسها

طب على اى اساس القرار......أيه اللى شافوه فى نفسهم يؤهلهم للترشح...و هل هما شايفين نفسهم اكفاء و يقدروا يكسبوا يعنى....؟؟؟؟

اكيد الموضوع ليه ابعاد نفسية رهيبة....لان الظاهر فى الاغلبية هو طيران العقل و ده مبرر جدا....الناس دى اتهرست لمدة سنين طويلة

و اللى كلهم اجمعوا تقريبا عليه هو الترشح لتحقيق العدالة الاجتماعية و المساواة...على اختلاف طبعا طريقة تنفيذها والهدف منها,,,و ممكن نبص للموضوع بمنظور فلسفى و كوميدى فى نفس الوقت

يعنى مثلا الاخ اللى عايز يترشح عشان يحقق عدالة اجتماعية فى توزيع الحشيش و عدم معاقبة اللى بيحشش و لكن نعاقب اللى بيتاجر اسوة بالدول التانية..دى وجهة نظره

يعنى لو بصنالها بمنظور تانى...هوة رافض مثلا لمبدا معاقبة الصغيرين و مكافاة الكبار على فسادهم فى بلدنا...(رواسب نظام فاسد
 (:D

و عاملة النظافة اللى فهمت من جواها ان البلد مليانة زبالة و محتاجة تنضف و مش مستقلية بنفسها لانها بتنضف زبالة الناس و بتشل قرفهم و شايفة نفسها جديرة بالرياسة عشان البلد تنضف

و الميكانيكى اللى عارف ان البلد زى العربية العطلانة و محتاجة تتظبط و تتصلح و تاخدلها وش دوكو كده عشان تلمع و ترجع نضيفة زى الاول

و وريث الملك فاروق اللى محدش عارف جه منين اللى هيرجع الملكية تانى و بيقول انه ابن الملك فاروق من الحاجة كاميليا اللى اتوفت فى حادثة طيارة....قاصده كبعا الفنانة كاميليا...هاهاها

و واحد من اخر سلالة ادم

 و التربى و اللى بيشتغل مسحراتى فى المواسم طبعا.....من منطلق مهنته فهوة عارف اخرتها و عارف اخر الدنيا ايه....وحدوووووووووووووه

انا اللى هارش كل حاجة و اخرتكو عندى...فاحسنلكم اوديهالكو بنفسى...و على ايدى هودى البلد كلها القرافة و اريح الشعب المسكين ده

وواحد سلفى بيطلب من الشعب العفو عن حسنى مبارك امير المؤمنين السابق و عدم الخروج على امير المؤمنين القادم

وواحد حرامى تاب و قرر يترشح عشان هوة خلاص عرف قيمة القرش الحلال و جرب السرقة خلاص و مش ناويها تانى فطبعا ده اللى هيحافظ على مصر

و واحد قرر ان هوة يترشح عشان حسنى مبارك من 20 سنة جاله فى المنام و قاله : انا بحملك المسئولية...و غيره و غيره و غيره
 
اه ماشى...انا معاكو..كلنا حسينا ان البلد بلدنا و عايزين نخدمها , بس مش للدرجة دى يعنى...و لا هوة شو اعلامى و خلاص

للاسف دى اخرة العيشة تحت سلطة انظمة قمعية مستبدة و تغييب المجتمع لسنين...و القهر و الظلم الاجتماعى و الفقر المضجع

البلد ياعينى كلها بقت مجانين على مجاذيب و كله بقى عايز علاج نفسى

دى تجميعة تقريبا لكل الفيديوهات اللى اتسجلت مع الناس دى

 

 

http://www.youtube.com/watch?v=WcbORMFgR1U&sns=fb&noredirect=1

كفاية بقى ورمنا

"WEREMNA"...يوميات مواطنة مفقوعة.....الحلقة التاسعة

قالك العيد العالمى للمراة....كل سنة و انا طيبة و كل ستات مصر الحلوين طيبين

امهات مصر و بنات مصر و الستات الجدعان اللى محدش يقدر عليهم و اللى لسة الراجل الشرقى بيعاند نفسه و بيعاند الطبيعة و مصمم انها كائن اقل منه فى كل حاجة

عامة مش دى مشكلتى النهاردة...المشكلة ان العيد السنة دى يوافق فى نفس الوقت الذكرى الاولى لليوم المشئوم 9 مارس ..و اللى تم فيه اول احتكاك رسمى وحشى بالثوار فى الميدان و تم القبض على كتير منهم و من ضمنهم رامى عصام مطرب الثورة و تم تعذيبه بصورة مهينة جدا هوة و كتير من البنات والولاد اللى زى الفل على ايدين ضباط جيشنا فى المعسكر النازى اللى كانوا عاملينه فى المتحف

و يزامن كمان الحكم العظيم فى قضية سميرة ابراهيم اللى رفعتها  بعد تعرضها لكشف عذرية على خلفية احداث 9 مارس و اللى اتحكم فيها ببراءة الطبيب المجند اللى اقام عليها الكشف

 و اكتر ما يضايق فى الموضوع ..اذا تغاضينا عن الاهانة الحقيرة للمراة و كسر نفسها و اهدار كرامتها كانسانة ...لان مع الاسف فى مجتمعاتنا , من مواهبنا العظيمة هى التفنن فى اهانة المراة بكل الطرق و بنعرف ازاى نكسرها بمهارة شديدة...هو التبلد و كان مفيش حاجة حصلت من اغلبية المجتمع

طيب احتفل بايه بس....و انا شايفة ان ناس كتير مش فارق معاها الموضوع اصلا و شايفين ان البنات دى كدابة....و ان الادعاءات دى افتراء على الجيش و المجلس العسكرى

احتفل ازاى وسط شعب لا بقى بيهزه دم ولا شرف

احتفل ازاى فى مجتمع  خلعت عنه ذكوريته ادنى احساس بالذنب او بالمسئولية

طيب احتفل ازاى و واحدة بنت من بنات بلدى  اتعرت غصب عنها على الملا او فى الخفاء....و فيه منها كتير....على ايد من هم من المفترض عليهم حمايتى و حماية بلدى و اللى المفروض يحافظوا على عرض مصر و عرضى اللى من عرضها...لا و ايه الناس بتقول احسن.....هوة ايه اللى منزلها التحرير اصلا...تستاهل

فالحين بس البلد تتقلب و الراى العام يسخن على عالية المهدى لما تقلع بمزاجها فى صورة على مدونة خاصة بيها و الكل دخل بمزاجه برده عشان يشوف صورتها....و لكن ازاى...و برده هنتغاضى عن هدفها من صورها و ان هية بتعبر بطريقتها عن حرية المراة المهضومة او ايا كان غرضها...المهم نشغل نفسنا باى حاجة ملهاش لازمة....المهم برده نتفرج عالمزة العريانة

طيب من مبدا الرجولة و الذكورية المطلقة....منزلين ليه الستات تشتغل و تصرف عالبيوت و تتبهدل...مقولتوش ليه ايه اللى منزلها اصلا من بيتها و مشغلها ؟؟؟ ...مين ادى الحق لراجل طول بعرض انه يتصرف عليه او يبقى حق من حقوقه المكتسبة انه يطلع مراته تشتغل و فى الاخر ياخد مرتبها و تمن عرقها فى جيبه و بعد كده يقول عليها اصلها ناقصة و مبتفهمش؟؟؟؟

عارفين فى كام اسرة مصرية بتعولها المراة...؟؟؟...ملايين الاسر المراة هية اللى بتصرف عليها و هى العائل الاساسى ليها

عارفين فى كام سيدة محبوسة بسبب عدم سداد كمبيالات عشان كانت بتجهز بنتها؟؟؟؟

مين ادى الحق لاى راجل انه يهين المراة باى شكل...بكلمة , بفكرة, او بتصرف او حتى بحكم محكمة من قضاء فقد هيبته....طيب لو انت شايف انها كائن سيىء..او غبية .....ليه بترضى بكل ده

انت بتحب تهين امك...؟؟؟...و هية اول امراة فى حياتك و اللى ادتك اكسير الحياة...هل هى غبية فى نظرك؟؟؟...او كائن ناقص

لو انت شايف كده.....يبقى انت شخصيا ناقص...لان اللى ربتك امراة...و مع الاسف فى ناس لما تحب تهين واحد تقوله اصلك تربية مرة....طب بالمخ كده...يعنى هيكون تربية مين...اى بنى ادم فى الدنيا من اصغر واحد لاكبر واحد و من اسوا واحد لاحسن واحد اللى ربته هى ست...بس الفرق بينهم هى الست اللى ربته , شخصيتها, تربيتها, رؤيتها للحياة...لو بصينا للست هنعرف بالتاكيد نوعية الاطفال اللى هتجيبهم...و المراة الناجحة الذكية عادة بتربى انسان ناجح

و مع الاسف انا اختلف كتير مع الناس اللى بتقول ان الستات فى مصر واخدة حقها و زيادة و عايزين ايه يعنى تانى كمان مش كفاية كده

احب اقولكم ان لو فعلا عاوزين تتاكدوا ان كانت الستات فى مصر مكرمات فعلا و واخدين حقهم...بصوا لحال البلد

مفيش بلد فى العالم ابدا و محصلش انها تقدمت او انصلح حالها و حال المراة فيها مزرى....انتوا شايفين حال بلدنا ايه ؟؟؟

  قارنوا بين حالنا مثلا و حال السويد  او اى دولة محترمة تانية و شوفوا و قارنوا بين حال المراة هناك و حالها هنا

  مع الاسف..احنا نسينا دور المراة فى مصر و العالم على مر العصور....من زمان تعالت الاصوات فى محاولة اسكات المراة و اخراسها , فى اوروبا لما كانت تفكر تتكلم يقولوا عليها ساحرة و يحرقوها

حتى هنا فى مصر...هيباتيا العالمة المصرية...تم سحلها و سلخها عشان اعتبروا افكارها ضد ارادة الله و تعاليمه

اما فى بلاد العرب...فهى اصلا عار و لازم توؤد من الاول عشان نخلص

فى بلادنا...يتم قتل المراة اذا تم الشك فى سلوكها بس...محدش بيستنى لما يتاكد حتى....مجرد رمى الكلام كافى فى بلادنا لقتلها

لو تم اغتصاب اى امراة.....يتم القاء اللوم الكامل عليها...من عينة ما هو طبعا, تلاقيها كانت لابسة  لبس مثير...او يعنى هو ايه اللى منزلها من بيتها اصلا.....الخ الخ

التمتع بثقافة القاء كل اللوم على الضحية و قتلها نفسيا و معنويا....و كمان بنكافىء اللى اغتصبها و نجوزهاله عشان نقضى عليها خالص كامراة و كانسان

  

 اما دور المراة فى ثورة 25 يناير مفيش حد يقدر ينكره او يهمشه....و مع ذلك نلاقى ناس تستنكر عليها حقها فى ابداء رايها و فى الجهاد و بينكروا عليها حلمها لبلدها

نسينا دور المراة المصرية فى ثورة 1919 و سقوط شهيدات كتير وقتها.....و لكن احنا ناخد منها مجهودها و بعدين نقولها اقعدى بقى فى بيتك كفاية عليكى كده ربى العيال و نسرق مجهودها

ان شاء الله هبقى احتفل بالعيد العظيم ده...لما الاقى نفسى من حقى امشى فى الشارع و انا امنة ..من التحرشات...من سماع كلام سخيف...من اهانات عالفاضى و عالمليان من ناس بتعتبر المعاكسات و التحرشات فرض عين عليهم لو معملوهوش هيدفعوا غرامة

هبقى احتفل ان شاء الله...لما ملقيش الصاق الصفات السيئة كلها فى المراة و ابعاده عن الرجل....يعنى نفسى مسمعش جملة زى : بطل يابنى زن بقى ...ايه شغل البنات ده

مش عايزة اشوف حد ماسك طفل صغير بيقوله : بطل عياط بقى , انت كده عامل زى البنات

نفسى مسمعش تانى جملة : خلى عندك كرامة بقى و الا تبقى زى البنات

نفسى ابطل اسمع جملة : بلاش شغل نسوان بقى

نفسى ابطل اسمع جملة : ايه التفاهة دى...سبت ايه للبنات

نفسى لما بنت تتعاكس فى الشارع الاقى كذا واحد يقول عيب كده هوة احنا مش ماليين عينك او يتلموا و يمسكوا اللى بيعاكس و يدوله علقة تمام يخاف بعدها يبص جنبه

نفسى ابطل اسمع كلمة : حريم

و لما ان شاء الله القوانين تبقى تحترم المراة و تجيبلها حقها و الاقى شعب كده واعى و عنده دم و نخوة..

يومها هبقى احتفل

كفاية بقى ورمنا

 

"WEREMNA"...يوميات مواطنة مفقوعة.....الحلقة الثامنة

بما اننى انا ورمت من جملة  " البرادعى العميل " و ان هوة اللى ضيع العراق و الخ الخ ....و نفسى اشوف حد بيقولها عنده الدليل

و بما اننى مش برادعاوية  و لا من الانصار المتشددين ليه....هوة بالنسبالى مش اكتر من راجل احتمالات انه يكون مرشح رئاسى لية كانت كبيرة و احتمالات انه يكون رئيس تمام لمصر لا باس بها و انه يكون من اصحاب النوايا الحسنة و ياخد بادينا و الخ الخ الخ

نفسى بقى اللى يتهم حد بحاجة...يحاول يتعب نفسه شوية و يبنى اتهامه على اساس دلائل و قرائن و شوية تشغيل مخ...مش نردد كلام مرسل و خلاص ممكن بيه نلطخ سمع ناس شريفة او نقيد بيه فتنة

مع التاكيد على فكرة ان مفيش حد ملاك و مفيش حد معصوم من الاخطاء و لا حد ماشى فى خط صح علطول او غلط علطول و طالما قررت اننى العب سياسة يبقى انا اديت لنفسى رخصة اننى اعمل اى حاجة او اقبل اى حاجة و اللى يقول غير كده يبقى منحاز و خلاص

انا بقى قررت  اننى افكر بصوت عالى شوية اجمع ادلة و احط فكرة جنب فكرة يمكن اوصل لحاجة...احتمال تكون صح و احتمال تكون غلط

يعنى مثلا  لو جمعت فكرة ان قبل الثورة بفترة و خلال العامين 2009 و 2010...و من بعد ما قرر البرادعى انه يخوض الانتخابات الرئاسية ضد حسنى مبارك و انه ينشىء الجمعية الوطنية للتغيير..وعلى حد ذاكرتى المحدودة ان فى اى مناسبة رسمية يتواجد فيها مسئولين امريكيين و البرادعى....كانوا بيسلموا عليه بالعافية و محدش بيقعد جنبه منهم.....فمنين هوة حبيب الامريكان و عميل؟؟؟؟

طيب بلاش دى...ليه بعد ما قابل كارتر فى يناير اللى فات تانى يوم اعلن انسحابه من سباق الرئاسة لو هوة العميل و رجل امريكا اللى هيحققلها مصالحها و اللى كان ممكن يبقى توليفة حلوة كده مع الاخوان و يتلزق فى اى حته...؟؟؟؟....يعنى فكرة كده و سؤال ممكن يكون ليه اجابة مش معروفة

البرادعى ما له و ما عليه من خلال مقالات و مصادر امريكية

ده فيديو للتقريرالنهائى للوكالة اللى اعلنه البرادعى قبل الحرب على العراق و اللى مجاش على هوى بوش وقتها و اعلن الحرب برده

 ده مقال من صحيفة النيويورك تايمز...و ده رايها فى البرادعى بتاريخ 16 يناير 2012

http://topics.nytimes.com/top/reference/timestopics/people/e/mohamed_elbaradei/index.html 

:مع ترجمة لمقطع عن تاريخ البرادعى يوضح رايهم فيه

قبل الغزو الاميركي للعراق،أعلن السيد البرادعي عن عدم وجود أدلة على أن صدام حسين قد قام باحياء برنامجه لتصنيع الأسلحة النووية، وهو ما اثبت بعد ذلك انه صحيحا و هو ما ادى الى انه لم يكن محببا من ادارة بوش، والتي حاولت، دون جدوى، لمنع له إعادة تعيينه عندما انتهت فترة ولايته في عام 2005.

في عام 2007، اكتسب السيد البرادعي رؤية جديدة عن طريق وضع خطة عامة لمحاولة حل المواجهة النووية بين الغرب وطهران -مرة أخرى قام باضافة تكديروتاريق لواشنطن. 

 وطبقا لمنتقديه في الغرب : انه مذنب و قام  بعدد من الخطايا الدبلوماسية خطيرة -و هى التحيز تجاه إيران، والتهور، وقبل كل شيء، والاحساس بالعظمة و بسذاجة و هو ما اودي به للوصول إلى ما هو أبعد من مكانه الحالى

و قال البرادعى ان النظام العالمي للأمن النووى هو عبارة عن فوضى

وده مقال من البى بى سى نيوز بتاريخ مايو 2007

http://news.bbc.co.uk/2/hi/middle_east

 /2596447.stm

:ودى ترجمة لبعض ما جاء فى المقال  

على الرغم من أن البرادعي قد توافق مع الادارة الحالية في عدد من القضايا المتصلة بالطاقة النووية الرئيسية، ولكنه لا يخشى التعبير عن رأيه.

و كان قد انتقد بشكل خاص ما يراه الكيل بمكيالين من جانب البلدان التي لديها أسلحة نووية، ولكنها تسعى لمنع الآخرين من شراء اسلحة لهم

   

:الازمة مع الولايات المتحدة

ان اراء البرادعى بخصوص قضية العراق لم تكن دائما تتفق مع اراء ادارة بوش

كما ان انحيازة لايران اثار مشاكل مع الولايات المتحدة و حلفاؤها من الاتحاد الاوروبى

ومع ذلك، فقد وجد السيد البرادعي توافق مع الرئيس بوش حول عدد من القضايا - ولا سيما على ضرورة استكمال النووية معاهدة حظر الانتشار، والمعاهدة الرئيسية التي تسعى إلى الحد من انتشار الأسلحة النووية، وضرورة معاقبة الدول التي تختار الخروج من المعاهدة بعد الحصول على معدات نووية تحت ستار برنامج سلمي

وكلاهما حريص على ايجاد وسيلة لحرمان الدول التي ترفض التوقيع على المعاهدة، أو تلك التي يشتبه فيها فى الالتفاف على الاتفاقية، والحصول على التكنولوجيا التي يمكن أيضا أن تثري اليورانيوم أو الوقود reprocesses والتي استخدمت في للمفاعلات النووية السلمية والتي يمكن استخدامها في صنع قنابل نووية

ده كله من مقالات و مصادر امريكية مختلفة و من قبل الثورة و بعد و كلامها مختلفش عليه...ده بالنسبة للاعلام و الصحافة 

و لو جينا افتكرنا فى 2010 مشوار البرادعى للحصول على تاييد و تحالفات و قراراته اللى كان بياخدها و يرجع فيها كتير مرة ياخد قرار انه هيخوض الانتخابات الرئاسية و مرة يرجع فيها و ده اتكرر تانى بعد الثورة ...و مرة يتحالف مع الاخوان و مرة ينفى ده , و ده سببلى انا شخصيا احباط لاننى كنت من المؤيدين للجمعية الوطنية للتغيير

فهو مع الاسف اثبت انه غير محدد الاتجاهات و متذبب فى قراراته و احيانا كثيرة يقوم باتخاذ قرارات و مواقف ضعيفة و ليست على مستوى الحدث هو ما ادى الى لخبطة و احباط الكثير من مؤيديه ومريديه و من كانوا يتمنون ان يصبح فى السلطة و تهليل من قبل كارهيه

اتمنى اننى اكون وضحت شوية وجهات نظر مختلفة و ممكن اكون صح او غلط و لكن المهم ان الواحد يفكر بطريقة منطقية

 و بلاش اتهامات على اسس باطلة و كلام مرسل ملوش لازمة

كفاية بقى ورمنا

      .

 

"WEREMNA"...يوميات مواطنة مفقوعة.....الحلقة السابعة

اثناء مشاهدتى لمهزلة مجلس الشورى و وصلة الهذيان المستمرة و السؤال العام المحير هوة مين السبب و مين اللى اعطى الاوامر و مين  و مين و مين...و ولا حد بيجيب سيرة المجلس العسكرى غير ناس تتعد على صوابع الايد الواحدة اذا وجدوا اصلا , مع ان هو مفتعل الازمة و مفجرها و هو الطرف الاول فيها...بس ما علينا ,,احنا دايما بنجرى فى دايرة الاسئلة اللى عارفين اجاباتها و بنستهبل
المهم ده مقال اتنشر فى الواشنطن بوست يوم 3 مارس و جون ماكين شيره على حسابه الشخصى عالتويتر  و لانه فى كلام مهم فقررت انشره

http://www.washingtonpost.com/opinions/egypts-small-concession/2012/03/02/gIQAq8jOpR_story.html

: النقاط المهمة

* ستة امريكيين و سبعة من جنسيات مختلفة سمح لهم بمغادرة مصر بعد دفع مبلغ 4 مليون دولار

*جنرالات المجلس العسكرى يستحقون الازدراء لانهم لم يركعوا الا بعد اصرار اوباما على قطع المعونة العسكرية

* ان المجلس العسكرى افتعل ازمة مقصودة

*اذا كانت المنحة الوحيدة للمجلس العسكرى هى السماح للاجانب بالمغادرة فكلا من امريكا و قضية الديمقراطية فى مصرسيقعان تحت معاناة

*ان المنظمات متهمة بانتهاك قانون عفا عليه الزمن و تعسفى و الذى لم ينفذه ابدا نظام مبارك و هو ينص على تسجيل المنظمات و اخذ تصريح بالمعونات و المنح

و ان المنظمات قد قدمت اوراق التسجيل منذ سنين و لكنها لم تتلقى اى رد

*ان الافراج عن الاجانب يعزز الاحساس القومى بالمؤامرة و يعرض المصريين و المجموعات للخطر

*الحل الوحيد هو ان تقوم الحكومة بتسجيل هذه المنظمات و اخطار النيابة العامة انها لن تتعامل مع القضاء و ايضا تعديل القانون المجحف و هو الحل الذى يؤيده الاخوان المسلمين

* لا يجب ان يفترض الجنرالات ان مجرد الافراج عن الامريكيين قد حفظ لهم المعونة 

* المتحدثة باسم الخارجية الامريكية فيكتوريا نولاند قالت ان الادارة الامريكية تشعر بالقلق ازاء النتيجة النهائية للعملية القانونية و ان القرار باستمرار المعونة لن يتخذ قبل ابريل الا اذا تم تسجيل المنظمات و ان تاكد الادارة ان العملية الديمقرطية فى مصر تسير كما يريد الكونجرس

*  لقد اظهرت ادارة اوباما ان لا مساس بالمعونة العسكرية لكنها يجب ان تكون وسيلة الضغط التى تستخدمها لتحقيق الانتقال الديمقراطى فى مصر

     اهم حاجة ان الجنزورى طمنا النهاردة ان مصر لن تركع

  

كفاية بقى ورمنا

 

                   

"Weremna"......يوميات مواطنة مفقوعة...الحلقة السادسة

من اكتر من سنة , كنت اخدت قرار اننى مش هدخل فى جدال او نقاش مع حد بخصوص الثورة او اى حاجة بتحصل فى البلد عشان مش عايزة مشاكل و لا عايزة اخسر حد اعرفه...ولو ان ده مع الاسف محصلش....و قلت حتى مش هتناقش مع حد على الفيسبوك ..و طبعا فى بعض الاحيان مكنتش بقدر ...و قلت اعمل فى صمت و خلينى حاطة لسانى جوة بقى

و لكن شاءت الاقدار امبارح اننى اقع فى شخص او كائن او ايا كان المسمى من اللى كنت بحاول جاهدة اننى مقابلهمش و لا اصلا اعرفهم بس غصب عنى اتحط قدامى

هحاول احكى اللى حصل زى القصص الخيالية كده و اسمها قصة " لحاس البيادة " زى قصة الاسكافى كده و لو انها بالنسبالى كابوس مش قصة

امبارح كنت بودع واحد من اصدقائى المقربين عشان مسافر برة مصر و قلت اقعد نص ساعة مع الاسف بقم ساعة من حرق الدم...و احنا قاعدين كلنا و بنضحك و بتسال لو كنت عايزة حاجة من امريكا و الحركات دى كلها بتاعة المسافرين و الغلابة اللى قاعدين هنا...و فجاة دخل علينا شخص المفروض انه من معارفه

اهلا وسهلا, مروة ,فلان الفلانى , تشرفنا ..الخ الخ 

و اخبار التصوير ايه على حسك و الشغل و الكلام ده كله و فجاة دخلت المناقشة فى منعطف جديد..و هو الكلام عن قضية التمويل و سفر المتهمين الامريكان و التمثيلية الهزلية اللى احنا عايشينها دى..مع العلم انى لغاية نص المناقشة تقريبا مكنتش قادرة احدد اتجاهاته و هوة دماغه رايحة فين

و بما انه طبعا مستر امبورتنت و بيشتغل فى جهة ما ..مش سيادية.. و لكن ممكن عن طريقها توصله شوية معلومات عن الامريكان المتهمين...قعد بقى يتكلم كلام بان عليه انه عقلانى فى الاول و قعدت اسمعه قلت يمكن يكون فى زوايا فى الموضوع انا مش عارفاها

و طبقا للى هو قاله..ان الصفقة اللى حصلت مينفعش يتقال عليها...سبحان الله هو عرفها ازاى....و المجلس العسكرى مش مجبر يشرح اسرار سياسية للشعب..و ان فى بلاوى كتير حصلت فى البلد..و طبعا هو الوحيد اللى عارفها...و ان مصر كان عليها حظر على صادراتها و مش عارفين ناخد فلوس او معونة و الاقتصاد بينهار و الخ الخ الخ

و طبعا الصفقة اللى حصلت دى كانت ورقة ضغط سياسى على امريكا عشان تنفذلنا مطالبنا  و ان احنا دلوقتى هنشوف تغيير جذرى بقى

كل ده لغاية هنا حلو....و فجاة....جت سيرة البرادعى و سمعت فيها كلمة العميل...سكت و قلت اسمع للاخر, استمرت النغمة بتاعة : اصل الخونة بقى هيقعدوا يتكلموا فى الموضوع و يهيجوا الشعب و هما مش فاهمين حاجة اصلا

و هنا بقى فتحت بقى : هوة انت تقصد مين بس بالخونة اللى بقالك ساعة بتتكلم عليهم

قاللى : كفاية , 6ابريل, الجمعية الوطنية للتغيير و البرادعى,,,,و نسى يا عينى الاشتراكيين الثورين...معلش بقى المرة الجاية ابقى اقوله

قلتله : انت شايف انهم خونة ؟؟

قالى طبعا...و التاريخ مش هيرحم حد و مسيرهم هيتكشفوا و احنا الشعب مش هنسكت عليهم و لا على الثوار و لا على اى حد هيخرب البلد

الكلام لغاية هنا طبيعى جدا...شفته و سمعته مليون مرة على الفيسبوك و فى برنامج عكاشة و سبايدر و حتت كتير

و طبعا عشان مطولش, هوة شايف ان منظر الناس اللى اترمت فى الزبالة و هية ميتة ده كان فى اليونان و طبعا مش محتاجة اقول رايه فى فتاة التحرير ...اما بقى احداث محمد محمود الاولى فطبعا كان ليه راى كلنا عارفينه وهو ان الناس كانت بتعمل ايه فى محمد محمود و كانوا رايحيين يقتحموا وزارة الداخلية و ضربوا مطاطى و خرطوش على الشرطة و ان المصابين لما اتضربوا قبلها كانوا قافلين الطريق بعكازهم و باصابتهم...مشاغبين طبعا

اقوله : طب انت شفت حاجة بنفسك...يقولى اه طبعا مع انه قال ان هوة راح قبل كده بس عشان يشرب شاى فى الميدان
اقوله : انت هتستعمانى وتكدبنى فى اللى انا بشوفه و عايشاه
يقوللى : انتى مغرر بيكى زى ناس كتير نيتها كويسة
بس احنا مش هنسكت على علاء عبد الفتاح و اسماء محفوظ و الخونة كلهم يا رب يموتوا هما و الثوار كلهم...يلا و بالمرة انا معاهم كمان...مانا مغرر بيا بقى و ماشية مقفولة العين و الودان و قلبى عليه غشاوة و الثورة و كلالى دماغى

وطبعا هستيريا الضحك  و الشلل فى نفس الوقت انى اقوله سيبك من كل حاجة و لكن فيه حقيقة واحدة ان اكتر من الف بنى ادم ماتوا فى محمد محمود اول مرة

قالى : فى ستين داهية , يستاهلوا مش مشاغبين يبقى دة مصيرهم

و خدوا دى بقى : ان اى واحد من الشعب الحقير يفكر يشتم او يرمى طوبة على اى عسكرى يبقى لازم يموت علطول

و ان احمد حرارة دى كلب يستاهل كل اللى حصله و ان شاء الله هيموت

طبعا اللى يعرفنى هيعرف ان انا عصبية و شكلى هيبقى عامل ازاى و انا بسمع الكلام ده...قلت اقوم بقى عشان معملش مشاكل و امشى احسن..و قمت من على الكرسى فعلا...انما يسكت...لا طبعا

و دخلنا بقى منطقة الابداع الفكرى : قالك ان اى عسكرى جيش او شرطة فى البلد دى  مش مسموح انه يهان او حد يتكلم عليه و لا يشتمه ..ده حتى المجندين فى الجيش و العساكر مفيش ضابط يجروء يشتمه بامه او يهينه ( طبعا ده على اساس برده ان دى حاجة انا مشفتهاش بعينى بحكم ان ابويا كان و, الحمد لله انه كان من قادة الجيش , فى يوم من الايام و شوفت بعينى ازاى الضباط بيعاملوا العساكر و المجندين و ازاى بيتشتم طول النهار و بيشتغل سواق الباشا والهانم و الاولاد و الخدام اللى بيعمل شوبنج للاسرة و ينضف البيت بالسخرة...و انا كطفلة كنت بشوف ده و افتكر فى يوم و انا عندى 8 سنين سالت ابويا و قلتله : هوة ليه يا بابى مش بتخلى السواق بتاعك يودينى المدرسة و يجيبنى زى فلان ما بيعمل ؟؟؟

قاللى : احنا يا بنتى مش بتوع الكلام دة..هما مش خدامين عندنا

لان ابويا ضابط شريف و ده مش عشان هوة ابويا و لكن
 انا شفت ضباط تانيين بيعملوا ايه و عايشين ازاى بس هما طبعا فيه بدلة بتديهم الحق يعملوا اى حاجة...و الاخ اللى كنت بتكلم معاه غالبا كان بيتكلم عن ضباط من الجيش السيريلانكى تقريبا

و طبقا لكلامه فاى كلب من الشعب الكلب ده هيشتم او هيرمى طوبة على عسكرى بيحميه فهوة يستاهل القتل فورا و اى حد مات من اول الثورة لغاية دلوقتى هوة مشاغب و ملوش لازمة عند البلد اصلا
و طبقا اخدنا معلومة سرية جدا من الاخ المواطن الشريف : مشوفتش بقى يا معلم امن الدولة و الزنازين الجديدة اللى عملوها للخونة دول ...تحفة تجنن
سالته : و انت ان شاء الله شفتها فين ؟؟؟
قاللى : انا لية معارفى و مصادرى جوة
لحاس بيادات اصلى برده  

و اخر جملة بقى اللى نهيت بيها الحوار الحمضان ده سالته : طيب انت شايف ان العملاء هما 6 ابريل و  كفاية و البرادعى ..طيب بالنسبة للمجلس العسكرى ..انت شايف طنطاوى ازاى ؟؟

خدوا دى بقى..قاللى : ده ضابط فى الجيش المصرى و بيحكمنى و اكيد راجل كويس يبقى جزمته فوق راسى و راس اى حد من الشعب
لحاس بيادات عالمى

بس بقى و كان ردى اللى خرجت بعده علطول مقدرتش : جزمته على راسك انت لو انت شايف كده  بس مش على راسى انا و مفيش حد يحط جزمته على راسى

مع الاسف ضغطى على و اتعصبت و انا كنت واخدة عهد على نفسى اننى مش هتعصب تانى و اريح اعصابى شوية من اللى بيحصل و اشوف مصلحتى بقى...بس مفيش فايدة.....المواطنين الشرفاء ورايا ورايا و ممكن طبعا يكون اى حد من اللى بيقرا المقال قابل منهم كتير بس انا بعدا نفسى عنهم من زمان و بعمل نفسى حتى مش شايفاهم على الفيسبوك و التويتر

بس انا عايزة اقولوهم حاجة : ايها المواطنون الشرفاء...لو انتوا شايفين ان دم اخواتكم ملوش تمن....و ان انتوا اللى تستاهلوا تعيشوا فى البلد من غير الثوار الشاغبين و ان جزمة اى عسكرى فوق دماغكم و ان المجلس العسكرى فوقنا كلنا و ان الثورة ملهاش لازمة...خلوا الجزمة  فوق دماغكم انتوا بس ارحموا دماغنا احنا...عشان هيا فوقها مصر بس مش جزمة و لا بيادة اى قتال قتلة او خاين لبلده

كفاية بقى ورمنا

                                      

  

"WEREMNA"...يوميات مواطنة مفقوعة...الحلقة الخامسة

بالنسبة للسادة المواطنين الشرفاء اللى حاسيين بالاهانة و انهم خدوا على قفاهم بسبب قضية التمويل و سفر الامريكان (حزب الكنبة , احنا اسفين يا ريس , احنا اسفين يا حمار و احنا اسفين يا مجلس العرر و ميدان روكسى و كل الناس الحلوة دى ) , و اسفة لو كنت نسيت حد فيكم ماهو اصل انتوا مع الاسف كتير اوى و صعب الحصر....بعيدا عن القضية نفسها و ابعادها , سؤال بس معلش : بتتحسروا على ايه و متضايقين اوى على ايه ؟؟؟...هوة انتوا الغفلة عمياكم للدرجة دى , مش دريانين مين اللى بيحكموكم من سنين طويلة....مش فاهمين النظام المصرى ماشى ازاى...مش فاهمين مصر بتتحكم ازاى من اكترمن 40 سنة....قولنا  مبارك عميل, قلتوا علينا خونة, قولنا المجلس كله عملاء و اللى بيحصل ده تمثيلية سخيفة نهايتها معروفة و هية المطاطية و بوس الجزم,,,قولته عملاء و اخرجوا بره البلد...الا المجلس العسكرى...ده اخر قشاية نمسك فيها...و الجيش و العيش والاستقرار...الخ الخ الخ .

 :انا بقى كمواطنة مصرية , محستش بالاهانة خالص 

  

لانى مهانة من يوم ما اتولدت قى البلد دى و مهياش حاجة جديدة بالنسبالى انى اعرف ان اللى بيحكمونى حطوا راسى فى الارض لانها فى الارض اصلا من زمان.

مهانة من يوم ما بلدى ركعت و باعت و مبقالهاش قرار و لا لازمة.
مهانة من يوم ما اهل بلدى اتضربوا بالرصاص و اترموا فى الزبالة و محدش سال فيهم.
مهانة من يوم ما البنات اتعرت و اتعملهم كشوف عذرية و مجاش حقهم.
مهانة من يوم ما اشلاء المصريين اترمت فى ميدان التحرير و بقينا نلمها زى لحم القطط المداسة بعربيات فى الشارع.
مهانة من يوم ما اتقال عالثوار عملاء و بلطجية .
مهانة من يوم ما المصرى بقى بيموت فى طابور العيش و الانبوبة.
مهانة من يوم ما المصرى بقى بيحط كرامته تحت جزمته عشان يعيش و ياكل عيش.
مهانة من يوم ما المصريين سكنوا المقابر و العشوائيات و بقت عيشتهم زى الكلاب.
مهانة من يوم ما حق شهداء حرب 73 راح و البلد راحت.
مهانة من  يوم ما القضاء اتلوث و اتاكدت ان محدش هيجيبلى حقى فى البلد دى.
مهانة من يوم ما الدم المصرى رخص و الجسد المصرى رخص و العرق المصرى رخص و الجنسية المصرية رخصت.

ادى القشة اللى اتعلقتوا فيها و ادى ورقة التوت وقعت و العورة اتكشفت...
ورونى بقى هتعملوا ايه ....؟؟؟؟

كفاية  بقى ورمنا