استكمالا لمسلسل انتهاك الحقوق المدنية للمواطنين و تقديم الشرفاء و النشطاء للمحاكمات العسكرية ......و استكمالا لفقع مرارتى , تم القبض امبارح على الناشطة سحر ماهر واللى كانت موجودة فى وقفة احتجاجية لتاييد المدون مايكل نبيل المحكوم عليه ب3 سنين سجن بتهمة اهانة الجيش و القوات المسلحة.... و الوقفة كانت عاما ضد المحاكمات العسكرية
و من غير الدخول فى موضوع مايكل نبيل اللى ليه زوايا كتير اوى......سحر كانت موجودة قدام مجمع المحاكم العسكرية س 28 فى مدينة نصر فى الوقفة اللى بتبقى عادة برة فى الشارع و لا تمت بصلة للمنشاة العسكرية من جوة ...و للى مش عارف المكان هناك , هحاول اوصل الصورة من واقع خبرتى الشخصية لانى اتعرضت لموقف مشابه فى اخر شهر مايو اللى فات
المجمع عبارة عن منشاة عسكرية مقامة فى منطقة سكنية , قدامها شارع صغير بيوصل من اول سور المحكمة لغاية اخره..المهم اخر الشارع ده بقى , بوابة كده بيبقى واقف قدامها عساكر و ضباط و لو فيه وقفة بيبقى فيه مدرعات كمان , يعنى احيانا...و فى وشها علطول عمارات سكنية..و بيفصل بين البوابة اللى على الشارع دى و العمارات حوالى من 8 الى 10 متر على اقصى تقدير , و هوه شارع عادى جدا العربيات و النقل رايحين جايين فيه عادى جدا برده برغم صغره
المهم اييييه...سحر كانت واقفة بتصور المظاهرة اللى بتبقى عبارة عن هتافات و يفط متشالة و خلاص و مفيش حد لا بيخرج و لا بيطلع ولا بيعرف يبص بعد البوابة دى اصلا فيه ايه جوة....قام جاى ضابط لوى دراعها و خد منها الكاميرا هى و مخرج تليفزيون مصرى و مصور اجنبى و دخلوهم جوة المبنى....عشان تتفاجىء ان معمولها قضية و الجلسة يوم التلات اللى جاى كمان و متوجهلها تهم , تجمهر و تصوير منشاءات عسكرية...مع العلم صعوبة تصوير اى حاجة مفيدة هناك وانها كانت مدية للمبنى ضهرها اصلا
الحقيقة انا مكنتش هناك و لكن من واقع اللى انا شوفته بعينى قبل كده فى نفس المكان...فاقدر اتخيل اللى حصل بالضبط لانى شاركت فى وقفة يوم 31 مايو لما اتحولت ريم ماجد و حسام الحملاوى و نبيل شرف الدين للتحقيق بسبب ان ريم جابت سيرة المحاكمات و تجاوزات الشرطة العسكرية فى البرنامج بتاعها...يومها حصل معايا موقف مشابه بس طبعا متطورش لان الحالة مكنتش اتدهورت اوى كده..و لكن يومها تم اهانة مصور شاب كان واقف جنبى من ضابط اعتقد برتبة عقيد و مضايقتى انا كمان بسبب ان احنا كنا بنصور حسام الحملاوى و الضابط طلع فى الكادر صدفة...طاب نعمله ايه يعنى....و بسبب فوبيا التصوير و الارتيكاريا اللى عندهم من العدسات الفوتوغرافية ...فازاى و ازاى يطلع بقى فى الكاميرات...قام جاى ساحب الولد و كان عايز ياخد الكاميرا منى....لولا ان الولد عصلج معاه فخدت فرصتى و كتيت من جنبهم بسرعة و سهيت العسكرى ...اصله كان غلبان اوى يا عينى...هههه
الفكرة ان يومها الدنيا عدت و مفيش حد اتحول للتحقيق ..الكاميرات بس اتصادرت و خلاص....و لو كان عندهم اوامر بالتعامل معانا بطريقة تانية كنا كلنا رحنا فى الشلالات...لان الوقفة كانت قوية جدا يومها و فيه ناس شتمت و فيه ناس كانت بتدعى عليهم عشان ولادهم متاخدين بقالهم شهور و ميعرفوش عنهم حاجة ...و شوية اغانى كده من عينة : يا ابو دبورة و شورت و كاب و يلا حالا بالا و كل الاغانى الحلوة دى....و اللى كانوا بيسمعوها و يبصوا لبعض و يبتسموا اوى مش عارفى على ايه
المهم ايه بقى...مشكلة سحر طبعا ان الضابط لما راح يكلم الناس عشان يبطلوا هتاف و ينزلوا اليفط , طلع فى الفيديو , قوم ايه طبعا الحالة اشتغلت علطول.....و الظريف برده, ان المخرج و المصور متحققش معاهم و طلعو ا و قاللهم تعالوا استلموا حاجتكوا تانى يوم
سحر دلوقتى افرج عنها على ذمة القضية و معادها هناك يوم التلات اللى جاى , للحكم فى القضية اللى معموللها
:و دى شهادة سحر ماهر
انا كنت بصور بموبايلي فى الوقفه الاحتجاجية اللى كانت قدام المحكمة العسكرية
احنا كنا واقفين شايلين بانرات لمايكل نبيل و بنطالب بالمحكامة المدنية للمدنيين و بالافراج عن معتقلي وزارة الدفاع
و كنا واقفين فى الشارع اللى قدام المحكمة مش جوة المحكمة
انا كنت بصور و ظهري للمحكمة يعني هي مش طالعه فى الكادر اساسا
و فجأة جالنا عقيد جيش من جوة و فرد دراعه الاتنين وزق الناس ورا كده بقوة
و قالهم لو عاوزين تتظاهروا اتظاهروا بدون كلام و هتافات و بدون لوح او اي حاجة مكتوبة
وهم بيتناقشوا معاه هددهم بالحبس و الضرب
انا كل ده كنت بصور
فجأة هو هجم عليا و لوى دراعي و اخد مني الموبايل
و سلمني لملازم اول احمد زكريا
و قاله دخلها جوة
دخلت معاه و لما طلعت فوق لقيته موديني لرئيس النيابة العسكرية
فضلت منتظرة حاولى ساعة و نص على اساس اني داخله اخد موبايلي
و بعد ما دخلت حولني لمكتب نقيب احمد شوقي للتحقيق معايا
و دخلت لقيته عامللى محضر و مجهزلى تهمتين و الاسئلة
و قاللي ان ملازم احمد زكريا قدم مذكرة قال فيها اني كنت بحرض على التظاهر و التجمهر الغير مشروع واني كنت بصور منشآت واسرار عسكرية
ووجه ليا التهمتين دول : التجمهر امام القضاء العسكري
و تصوير منشآت واسرار عسكرية
استمر التحقيق معايا حوالي ساعة سألني فيها عن سبب تواجدي فى المظاهرة و عن علاقتي بمايكل نبيل و عن تحريضي على العنف و التجمهر وحاجات كده كتير
و لطعني برة ساعتين تانيين
وبعدين وهو بيديني بطاقتي قاللى ان المحضر اتحول جنحة للحكم
و المحاكمة هتكون يوم التلات الجاى امام القضاء العسكري
و مضاني على تعهد انى احضر يوم التلات و الا هيتحكم عليا غيابي
و لما خرجت لقيت المخرج المصري اللى اتمسك و المصور الاجنبي خرجوا و افرج عنهم و ماتعلهومش تحقيق و المحكمة قالولهم هنكلمكم بكرة او بعده تيجوا تاخدوا حاجتكم
اما انا بس اللي اتعمللى تهمة و قضية و محاكمة
و صادروا موبايلي للفحص
دى شهادة سحر....و هحطلكوا برده لينك لتجربتى و اللى حصل يومها مع ريم و عرباوى ونبيل شرف
tp://marwa-bloggmemarwa.blogspot.com/2011/06/blog-post.html.... ده لينك لتجربتى و القصة كاملة
و ده فيديو لوقفة امبارح اللى اعتبرتها جريدة اليوم السابع مسيئة جدا للمجلس العسكرى طبعا
http://www.youtube.com/watch?v=CVSmP7kDq6I&feature=player_embedded
كفاية بقى...ورمنا
